Norður Atlantshafsbekkurinn (NGK) er námstilboð fyrir ungmenni á Íslandi, í Færeyjum, Grænlandi og Danmörku sem vilja ljúka stúdentsprófi á þremur árum og kynnast í leiðinni nágrannalöndunum þremur.
Kennslan fer að mestu fram á dönsku, námsframboð er samkvæmt danskri námskrá og um að ræða almennt stúdentspróf af náttúrufræðibraut.
Fyrsta námsárið fer fram í Danmörku, í Gribskov Gymnasium í Helsinge. Á öðru ári flyst námið á haustönn í skólann Miðnám í Kambsdal Færeyjum en vorönnin heim í Verzlunarskóla Íslands. Þriðja og síðasta árinu er síðan varið á Grænlandi í GUX, Sisimiut skólanum.
Í NGK bekknum eru nemendur frá þessum fjórum löndum, öll saman í bekk þau þrjú ár sem tekur að ljúka stúdentsprófi.
Í Danmörku búa nemendur í ungmennabúðum í næsta nágrenni við skólann, í Færeyjum á fjölskylduheimili nærri Kambsdal á Austurey og á Grænlandi er boðið upp á heimavist. Sjá nánar á heimasíðu námsins á vef Versló.
Umsækjendur þurfa að hafa lokið skyldunámi í samræmi við Aðalnámskrá grunnskóla. Umsóknir eru sendar Verzlunarskóla Íslands og Gribskov gymnasium á dönsku ásamt rökstuddri umsögn.
Engin skólagjöld eru innheimt en greitt fyrir húsnæði, uppihald og ferðir.
Námsgreinar eru fjölbreyttar en sérstök áhersla lögð á líftækni, norðurskautstækni, stærðfræði og eðlisfræði en einnig er á brautinni kennd málnotkun, náttúruvísindi, danska, saga, enska, íþróttir, samfélagsfræði, fornaldarfræði, trúarbragðafræði, fjölmiðlafræði og menningarfræði.
Náminu lýkur með stúdentsprófi af náttúrufræðibraut sem er sambærilegt og frá dönskum framhaldsskóla.
